شاعر أنا ولا أنا متشاعر
أنا معرفش
بكتب معنى ميتصدقش
ومش مفهوم
طيب قرب اعمل زووم
مش رح تفهم أى كلام
قلب الليل معجون اوهام
نكتب تانى
أما بعد..
صوت البرق ولون الرعد
بس كلامك ليه معكوس
واحد معنى ومش مخصوص
وشوية فكر وتفانين
يبقى المعنى متين ورزين
نرجع تانى نقوله بجد
حد بيزعل أوى من حد
انه بيغلط فى التفاعيل
نرسم تانى شكل النيل
فوق كل وشوشنا المصريه
كراسة حب ووطنيه
ومشاعر أحلامنا وبس
لو واحد فيكم هـــــ يحس
باللى انا دايما حاسس بيه
يبقى المعنى كله حياه
ح يسافر وياخدنا معاه
يرمينا جوه الاحلام
ارفع عنا ستار العتمه
قلب الليل معجون أوهام
مش رح نفهم أبدا بعض
شكراً ..شكراً..أما بعد
قول حاجه الله يخليك
الرمله بتجرح رجليك
والموجه مبقتش أمان
والبحر اللى انت بتشكيله
دلوقتى مليان أحزان
هات ايدك خليك ويانا
الدنيادى بتـسـتـنـانــا
والواقع بقى شىء محتوم
احساسى بتاريخ اليوم
رح اشخبط واكتب عنوانى
لحبيبتى فى الزمن التانى
مستنيكى تجينى هناك
الدنيادى مش عجبانى
لوفاهم حاجه متقولشى
لو مش فاهم يبقى خلاص
دى قصيده للمعنى الضايع
وحروفى ف لحظة افلاس
موضوع: لحظة افلاس 
